買盈喜股 高追蝕章

【達人專欄】割柑人

終於見到27000!恒指朝早衝上27007,但屠熊開餐後掉頭,收26941,升88點。闊別兩年嘅27000關,係2015年6月下跌裂口阻力,初試破關遇阻回調,屬於正常套利操作,並唔代表大市轉弱。期指結算在即,好友已連贏6個月,今個月贏多鋪冇走雞,挾死淡友之餘,後市有力再上。

港股連日創兩年新高,不過越係上升,越要有戒心,要更加留意上市公司業績係咪配合。重磅股友邦(1299)、滙控(005),分別會喺本周五、下周一放榜,成為支撐大市棟樑。業績期當前,大批公司發盈喜,過去一個月,有超過110間,當中26間預期中期多賺超過一倍,不過,唔係隻隻盈喜股都升,中煤(1898)就畀「摩笛」吹跌。追盈喜股前,記緊留意市場睇法。

揀股向來要睇盈利、派息等,揀有業績或盈喜支持嘅股份始終係王道。盈喜股通常消息一出即炒高,炒一陣又回調,所以冇貨唔緊要,可趁回吐吸納。上述26隻倍賺盈喜股,包括吉利(175)、舜宇(2382)等強勢股,不妨候低吸納,例如高位調整一成,或以平均線作參考。

港股連續21周錄得資金淨流入,北水一直掃貨。睇近期滬深港通資金流向,大戶正在收緊A+H股差價,部份內銀、內險A股出現淨賣出,而相關H股則出現淨買入。北水已成為港股主流動力,冇被納入滬深港通範圍嘅股份,變晒蜑家雞。

喺一眾倍賺盈喜股中,兼俱A+H股及滬深港通概念嘅有5隻,包括中石油(857)、海螺水泥(914)、中煤、濰柴(2338)、新華製藥(719),當中3隻嘅A股更喺「入摩」名單上,就係中石油、海螺、濰柴。我嘅心水係剛喺周二發盈喜,預告中期多賺90%至110%嘅海螺。

內地水泥價格由舊年3月起低位反彈,皆因基建投資及房地產投資回升,為水泥帶嚟穩定需求。多隻水泥股已先後發盈喜,包括華潤水泥(1313)、西部水泥(2233)、中材(1893)、台泥(1136)、亞洲水泥(743)等。海螺作為行業龍頭,自然睇高一線。該股現價28.25元,走勢上,呈現區域突破利好訊號。

Facebook fan page:
https://www.facebook.com/hkstockpicker/

八升陣勢 見「機」行事

【達人專欄】割柑人

呢兩日,中美全面經濟對話喺華盛頓召開,雙方官員埋枱開會前夕,先行埋枱食飯。席間,中國副總理汪洋放聲氣,叫美方放寬高科技產品出口;美國財長姆欽亦回敬,叫中方開放信息及通信技術產業。科技股當旺,納指、恒指孖住上,齊齊八連升。恒指收26672,今輪破頂升市逼使持倉比重較低嘅基金追入增持,呢啲挾weighting嘅基金買盤,成為大市短期動力。

喺時代巨輪下,無論國家、企業,以至個人,都要求變。以企業為例,作為管理層,要有vision之餘,亦要有帶領企業轉變、幫助同事轉變嘅能力。近日傳媒業最O嘴事件,莫過於肥佬黎賣壹仔畀黃浩,在商言商,無可厚非,但員工好㷫,形容單刁係「賣員工落妓寨」。壹傳媒(282)轉型數碼化,轉型唔係好難,點幫同事過渡先係最難。

講到轉型,諗起一隻機械設備股——中聯重科(1157),該公司係中國最大工程機械商之一,喺行內最早轉型。舊年公司進行供給側改革,將低效率項目斬纜,又進行營銷改革,優化人手,喺轉型陣痛中,勁蝕9.3億元人民幣;不過,今年首季已扭虧為盈,賺近8,500萬元人民幣;上周五更發盈喜,預告上半年賺11億至13億元人民幣。

內地上半年基建工程穩步增加,帶動混凝土機、起重機等機械嘅換機潮;加上中央喺「十三五」期間力谷城鎮化,中聯重科業績可望持續改善。該公司早前以116億元人民幣出售環保項目,預計帶來91.3億元人民幣利潤,有助補充流動資金,減低財務槓桿。不過,睇份盈喜通告,單刁應未完全入帳。

單刁完成後,中聯重科手頭現金將大增至200億元人民幣以上,可支持潛在併購。該公司係一帶一路先驅,早已「走出去」喺歐洲收購環保技術,又喺白俄羅斯投資,相信會繼續「沿路」插旗。

5月時,總理李克強曾到其開封工業園打個轉,仲話:「工程機械大數據對宏觀政策有幫助。」有總理祝福,股價即刻郁,由3月高位回落33%到5月築底,喺20天線搵到支持,拾級而上,近日更價量齊升,走勢轉強。

A股入摩,涉及222隻大盤A股,中聯重科A股(深:000157)係其中之一。該股H股現價4.14元,相對A股有26%折讓,相對每股資產淨值亦有27%折讓,仲未計出售環保項目收益。該股一向願意派息,舊年蝕本都派15分人民幣(17.16港仙),今年有望增加。機械設備股低潮已過,今年回暖,不妨見「機」行事,候回吐至4元樓下吸納。

Facebook fan page:
https://www.facebook.com/hkstockpicker/

轉戰AI 晨訊殺上

【達人專欄】割柑人

北水助陣,港股收復26000關,騰訊(700)亦收復280關。上周迄今,騰訊手機遊戲《王者榮耀》畀《人民網》同《人民日報》五度筆誅、《新華社》兩度筆伐,但股價依然硬淨!大陸又話支持電子競技,更會喺2022年杭州亞運會首度設立電競項目,點解又鬧爆《王者》呢?國策真係玄妙!

阿爺對科技業態度有變,可能同科技巨頭嘅影響力越來越大有關。講嘅唔只係吸金能力,仲有主宰其他行業興衰、主導生活文化興替嘅能力。現時手機可以購物、理財乜乜乜,但唔少行業因而式微;人工智能(AI)出現,更多工種將被取代。當科技發展有能力影響政府管治,政府干預唔奇。投資科技股,要留意箇中風險。

官媒圍插《王者》,主要係兩宗罪:一、令細路沉迷,玩物喪志;二、歪曲歷史,教壞細路。咦,武俠小說、電視劇集咪隨時瀨嘢?《王者》將荊軻變成女人,大台套《大太監》四大公公係李蓮英、安德海、彭三順、姚雙喜,慈禧太后確係有個近寵叫雙喜,不過係宮女喎!武俠小說中,不符史實嘅情節更加比比皆是。揸咗TVB(511)嘅,又多樣風險!

歷史書記載嘅,係咪一定真實?西晉皇甫謐《帝王世紀》記載伏羲阿媽華胥氏去雷澤郊遊,「有巨人跡出於雷澤,華胥以足履之,有娠,生伏羲於成紀。」嘩!踩下個大腳印就懷孕,難以置信囉!伏羲嘅最大功績係發明八卦,到十七世紀,德國哲學家兼數學家萊布尼茨(Gottfried Wilhelm Leibniz)受八卦啟發,發明二進制,成為電腦誕生嘅契機。計落伏羲係科技股之父!

科技股有好多瓣,包括資訊科技(IT)、生物科技(BT)等。AI同大數據仍然係大勢所趨,近日留意到業務由智能手機、物聯網擴展至AI嘅晨訊(2000),公司上周五話傾緊賣2G、3G、4G通訊項目,本周一又交出唔錯嘅營運數據,上半年收入增加8.4%;6月收入增加5.5%,其中主營業務增加18.4%。

雖然晨訊只係市值10億元嘅中小企,但科技投資同研發已開始進入收成期,有盈利又恢復派息,若AI方面有較大成果,估值可望重估。該股六日四度破頂,現價0.425元,每股資產淨值0.792元,市帳率只係0.54倍。走勢上,更呈現區域突破同三角突破利好訊號。

Facebook fan page:
https://www.facebook.com/hkstockpicker/

美息誘惑 國金股俏

【達人專欄】割柑人

市無千日好,股無百日紅!港股連升6個月,累升17%,但月線圖6月出現十字星;7月雖然開門紅,但轉頭就衰喺騰訊(700)手上,大市反身跳水,之後喺大行力撐騰訊下拗腰重上水面。大半個月嚟,恒指喺25500至26100上落營造三角形,周二跌穿底部,25557支持變阻力,周三收25521,未企返上去,走勢未改善。

外圍方面,周四美國聯儲局公布6月議息紀錄,兩周後則有日本央行、歐洲央行議息,收水係大勢。不過,市場最關心係周五美國公布嘅6月就業報告,睇下經濟係咪持續好轉,令聯儲局大條道理加快加息、縮表步伐。

講番騰訊,今趟躀低,皆因旗下手機遊戲畀官媒鬧爆,「王者」變罪人。騰訊呢一浪喺舊年12月下旬起步,到今年6月下旬見頂,累升六成,半年嚟累積大量獲利盤,借消息調整都正常。事實上,外圍科網股上周已出現調整,納指連續3日跌穿50天線,不利科網股。

新經濟股王騰訊有難,港股後市就要睇舊經濟股王滙豐(005)台戲。大笨象滙豐係大媽愛股,近月象鼻狂吸北水,睇港股通,滙豐第二季錄得230億元淨流入,單計6月就錄得71億元;踏入7月,本周三日分別錄得12億元、16億元、12億元,佔股份成交33%、31%、34%。

點解大媽咁捧滙豐場?英鎊滙價係原因之一!滙豐普通股喺香港、倫敦兩地上市,香港股價今年嚟升23%,倫敦股價只升14%,皆因英鎊兌港元升咗5.7%,故此落注滙豐某程度上等同落注英鎊!而兌美元滙價,英鎊今年嚟升4.9%,人民幣只升2%,大媽搬錢嚟買滙豐可以理解。

喺恒大(3333)、長汽(2333)、綠城(3900)三役,大媽暴力拉升股價挾爆淡倉,戰績彪炳,不妨跟大媽搵食,吼位搭轉順風車。滙豐今輪升勢,始於上周「摩笛」吹奏,話滙豐錢多,可以用嚟派息或回購嘅錢高達330億美元;加上又係美國加息同金融鬆綁嘅受惠股,料會繼續跑贏大市。不過,要留意沽空比率同英國脫歐對鎊滙嘅影響。

滙豐將會喺7月31日派中期成績表,如果你唔老黎佢一味靠慳又官司纏身,咁可以考慮其他同樣受惠於美國加息嘅國際金融股,例如宏利(945),該股係上次美國加息周期嘅股王,走勢上,更呈現頭肩底利好訊號。

Facebook fan page:
https://www.facebook.com/hkstockpicker/

全球買港口 中遠贏超人

【達人專欄】割柑人

眨下眼就回歸廿年!國家主席習近平來港出席慶典前,港股先洗太平地,呢兩日細價股洗倉洗到一地血,David Webb嘅黑名單成為血的印記,50隻股份中47隻爆缸,影響市場氣氛。結算前夕,港股繼續高位調整,收25683,跌156點或0.6%,失守10天線同20天線,短線支持睇6月16日浪底25557,重要支持睇5月18日浪底25025。

回歸廿年嚟,港股愈嚟愈「紅」,紅色資本已主導藍籌!睇下恒指組合,1997年6月30日回歸前夕,33隻成份股中只得3隻中資股,合共佔指數比重約5%;時至今日,50隻成分股中有成27隻中資股,合共佔指數比重近57%!

紅透半邊天嘅又點只恒指組合,港股整體都係!上市公司數目由當日嘅619間增至2,027間,中資佔比由83間增至1,019間;市值亦由當日嘅4.35萬億元增至28.54萬億元,中資佔比由16%增至64%;至於成交額,中資佔總成交比例就由36%增至75%!

習主席來港,點少得一帶一路,呢個project係佢嘅icon!中港剛啱就簽署兩份CEPA協議,包括納入一帶一路貿易,以及推動人民幣計價股票、H股全流通。另外,據新華社報道,發改委同國家海洋局已發布一帶一路「建設海上合作設想」,提出建設三條藍色經濟通道:一、經印度洋連接非洲、地中海;二、經太平洋連接大洋洲;三、經北冰洋連接歐洲。

航運股早排已有動作,中遠海控(1919)前周公布,阿仔中遠海運港口(1199)收購西班牙Noatum港口51%股權。呢一着正係中遠海控全球布局嘅重要一着,係掌握歐洲地中海沿岸嘅戰略棋子。中遠海控A股(滬:601919)上月中話「籌劃重大事項」而停牌至今,唔通仲有後着?

早喺2014年前,當中遠海控仲未二合一,仍然係中國遠洋同中國海運時,已全球買港口,提升競爭力。合併後更喺前年夥拍中投海外、招商局國際收購土耳其Kumport碼頭65%股權;舊年又收購希臘Piraeus港口67%股權及鹿特丹Euromax碼頭35%股權等。講到買港口,李超人都唔輸蝕,單計喺英國就買咗3個港口,皆因港口係國家命脈,握住港口控制權,等如握住該國任督二脈!

喺國策扶持下,航運股長遠前景唔錯。A股入摩,222隻入圍股中,中遠海控A股上榜。該股H股現價3.49元,較A股停牌前折讓44%,可望追落後。走勢上,10天線升穿20天線,出現黃金交叉利好訊號。

Facebook fan page:
https://www.facebook.com/hkstockpicker/

A股入摩 利港交所

【達人專欄】割柑人

本周嘅重頭戲本來係「A股入摩」,點知畀「超人引退」搶戲,雖然紅顏迅速出頭代為澄清,但空穴來風,超人前年話過「不寒而慄」,難免引起猜測。超人麾下8間上市公司,市值超過一萬億元,點只「關李家事」咁簡單!

隔晚夢醒時分,MSCI宣布A股入摩。食過3次詐糊,A股終於食糊!不過,港股未能借力重上二萬六關,早前偷步掃貨者,趁消息落實出貨,恒指收25694,跌148點或0.57%,插穿10天線及20天線滙聚點,若再跌穿上周五前浪底25557,則形成小雙頂,小心!

A股明年5月開始入摩,涉及222隻大盤A股,追蹤摩指嘅基金將要買入相關A股,喺資金流入下,A股自然水漲船高,並會帶動港股。策略上,可吼位照單執藥,權重中資金融股,包括內銀、內險、券商股可望領漲,港交所(388)亦會受惠,皆因海外資金需要透過滬港通、深港通買入A股。

要注意嘅係權重內銀股開始除淨,本周係民行(1988)、建行(939),下周到交行(3328),再下周就到工行(1398)、農行(1288)、中行(3988)。內銀除淨會影響股價、指數;派息則會影響人民幣、港元、美元滙價,因為中資股以人民幣計價,來港派息則需要港元,故需要換滙。

A股入摩後,市場下一個憧憬係回歸廿周年大禮。人行剛發布《債券通暫行辦法》,即日施行,但未透露正式開通時間,估計七一會有宣布。推出債券通,港交所又會受惠。港交所係獨市生意,收入主要來自港股成交、上市費用及各種相關費用,市況好壞直接影響其收入、盈利,以至股價。中金早前預計,隨着上市債券納入互聯互通,今年港股日均成交近800億元,明年則近960億元。

港股今個升浪,港交所都算大落後。恒指舊年12月28日喺21488搵到支持,升咗5個幾月上到二萬六關,累升21%;但港交所踏入6月先開車,由195.6元起步,上到208.4元後整固,無法喺200元樓上企穩。本周借力創新板消息反彈,現價200.2元,短線有望挑戰舊年9月高位211.2元。比對舊年恒指同港交所走勢,恒指喺18278低位,港交所係152.98元,若按比例上升,港交所見215元以上先合理。

Facebook fan page:
https://www.facebook.com/hkstockpicker/

資金翻兜 吼破頂股

【達人專欄】割柑人

今個星期剩低兩個交易日,主要有兩個戲碼——議息同結算。先講議息,戲肉係周四凌晨2時美國聯儲局公布議息結果,同日仲有英倫銀行、瑞士央行登場,周五就到日本央行。對於聯儲局,相比加息,市場更關注縮表,怕拿捏失準會引發金融危機。至於結算,周五既係A股期指結算之日,亦係美股四期結算嘅四巫日(Quad Witching Day),好淡激戰,在所難免。

好戲上演前夕,美股道指、標指再創新高,納指亦喺科技股帶動下反彈,可惜港股受安邦集團出事拖低A股影響,恒指只微升23點或0.09%,收25875。安邦係內地保險業巨頭,紅二代、官二代雲集,董事長吳小暉係鄧小平外孫女婿,咁又點?當局冇面畀,照拉!

恒指喺4月19日低見23723後急升,6月9日高見26090,不足兩個月累升2,367點,借消息調整唔奇,按黃金比率計算調整幅度,若回調0.382倍將下試25185。不過,喺憧憬MSCI下周公布A股「入摩」,以及七一有望收到回歸廿周年大禮之下,港股可望回氣再上。

美國科技股調整兩日後反彈,本港科技股龍頭騰訊(700)上周五破頂高見283.4元後,整固兩日又見資金翻兜,並以全日高位277.4元收市,升1.84%。以往騰訊每次調整至20天線附近就反彈,今次都係,若果再見調整,不妨參考此位開倉。

近日破頂後回調嘅股份,仲有3隻A股ETF——南方A50(2822)、安碩A50(2823)、華夏滬深300(3188),睇好A股「入摩」嘅話,亦可吼位吸納。股神畢菲特一向主張投資者買入指數基金,佢老人家喺2005年提出一個十年賭約,睇標普500指數定對沖基金回報高,2007年有基金經理接受賭約,賭注由2008年開始,今年底屆滿;不過,股神可以提前慶祝喇,皆因對冲基金回報已遠遠落後於指數。事實上,基金經理高昂嘅管理費,就係蠶食回報嘅主因。

講開股神,原來佢同深水埗明哥係同道中人!話說一年一度嘅畢菲特慈善午餐拍賣,早幾日剛以近268萬美元成交;自2000年舉辦至今18年,合共籌得約2,630萬美元,全數捐畀慈善機構Glide Foundation,用嚟為窮人同露宿者提供食物。咁咪同明哥派飯畀窮人同露宿者一樣囉!

Facebook fan page:
https://www.facebook.com/hkstockpicker/

車股掉頭 吼位上車

【達人專欄】割柑人

好佬怕爛佬,爛佬怕潑婦,上市公司就怕沽空機構!舊年12月中至今,6個月內已有7隻港股被狙擊,包括輝山(6863)、全通(633)、宏橋(1378)、豐盛(607)、瑞聲(2018)、科通(400),以及最新中伏嘅敏華(1999)。沽空機構專揀市值過百億嘅民企落手,一來民企財務報表易有破綻;二來以市值計,一日跌幾成,帳面就縮水幾十億,可以短時間賺大錢!

超級星期四前夕,港股高位整固,跌22點,收25974,二萬六關再次得而復失;主板成交870億元,較上日多近17%。港股市底仍強,後市若能企穩二萬六關,有望挑戰技術阻力位26155,即大時代浪頂28588至浪底18278嘅0.764倍黃金比率反彈幅度;短線支持位仍睇10天線,守穩則升勢仍在。超級星期四有英國大選、歐洲央行議息、美國FBI前局長國會作證,小心!

今年以嚟,環球資金集中追捧科技股。美股方面,反映科技股走勢嘅納指累升16.57%,遠遠跑贏標指嘅8.51%及道指嘅6.95%升幅。至於港股,恒生資訊科技業指數更累升36.08%,大幅抛離恒指嘅18.06%升幅,當中,騰訊(700)升幅高達44.27%!

跟開科技股嘅,不難發現一個有趣嘅現象,就係科技巨頭近年鍾意玩車!美國獠牙(FANG:Facebook、Amazon、Netflix、Google)中嘅Google,中國蝙蝠(BAT:百度、阿里巴巴、騰訊)中嘅百度先後開發無人駕駛汽車;阿里巴巴亦夥拍吉利(175)搞汽車產業智能化;騰訊則入股電動車製造商NextEV、Future Mobility及Tesla。BAT全部上晒車!

汽車股本來係強勢股,但近日受吉利、長汽(2333)5月銷量放緩拖累而掉頭,其實汽車股舊年銷量激增,喺提前消耗購買力之下,今年銷量放緩係意料中事。中國建投早前發表報告指,儘管今年新能源汽車補貼比例下降,但長期嚟睇,汽車新能源化係大勢所趨。

新能源汽車龍頭係比亞迪(1211),麥格理預期該公司新能源汽車銷售比重將由舊年嘅22%提升至2019年嘅51%。另外,瑞信又指該公司打算分拆電池業務。比亞迪係股神畢菲特現時手上唯一嘅中資股,信股神眼光,不妨留意下。該股現價46.85元,走勢上,呈現區域突破及三角突破。

Facebook fan page:
https://www.facebook.com/hkstockpicker/

學黃蓉投資 趁低買郭靖

【達人專欄】割柑人

論武功,俗世中不知邊個高!喺股市搵食,有時亦唔知邊隻係老實股,邊隻係老千股!中金同David Webb嘅黑名單,只係聊備一格。如果《射鵰英雄傳》中嘅郭靖、楊康同期上市,你會揀邊隻?

先講郭靖,大股東係江南七怪,保薦人兼包銷商係黃蓉,引入「天下五絕」基金中嘅洪七公、周伯通參股,專注提升技術、改善業績。至於楊康,控股股東係完顏洪烈,注入大金資產重組後易名完顏康,後因大宋本土股估值較高而回歸,改回楊康上市,既有大莊丘處機入股,又有細莊梅超風入飛,仲有最牛女散戶穆念慈頂頭槌落飛。

唔使諗,揀郭靖!點解?「股神」畢菲特話齋:「永遠不要投資你看不懂的企業(Never invest in a business you cannot understand)。」郭靖業務簡單,楊康則睇唔透,關連交易媲美瑞聲(2018),隨時會畀沽空機構狙擊;而且成日改名係老千股特徵之一,槪念多又點,只啱短炒,唔啱長揸!云云港股中,又有冇郭靖咁嘅潛力股?我近排留意緊天溢森美(756),畢菲特愛股可口可樂都係佢老主顧!

天溢係中國橙汁商,主要產銷自家品牌森美純鮮橙汁、售賣鮮橙,以及為可口可樂等飲品商供應濃縮橙汁。近排喺惠康同波仔促銷,賣到斷市;早幾日又宣布全國推出橙汁智能販賣機,並同央視簽約拍攝專輯。不過,連串動作未見拉升股價,皆因舉頭三尺有陰霾!

話說三年前,公司以1.12元批咗一億股畀鄧普頓基金,主席辛克當時承諾,三年後個人願意以1.7元買返。呢場對賭,今年三月尾到期,但至今仍未善後。天溢現價1.16元,市場擔心鄧普頓會喺市場沽貨,再索回差價。若果件事妥善解決,天溢應該會展開新一輪升浪。

天溢係成長中嘅公司,現價較資產淨值仍有兩成折讓,就好似初到張家口嘅郭靖咁,黃蓉識貨,趁低吸納。事實上,辛老闆過去兩個月亦三度增持天溢,四月嗰次平均價1.05元,五月兩次平均價都係1.17元,以真金白銀顯示對公司有信心。

Facebook fan page:
https://www.facebook.com/hkstockpicker/

息口油價 如兩生花

【達人專欄】割柑人

環球股市喺資金泛濫下連日衝高,呢兩日先開始回氣。港股亦喺衝破25400關後高位整固,昨跌42點或0.2%,收25293,成交縮減一成至696億元,只要唔再跌穿前浪頂5月2日高位24773及3月21日高位24656,屬大漲小回格局。港股市底強,加上香江如此多fund,有望回氣再上。

一帶一路峰會呢頭閉幕,嗰頭港鐵(066)就話有興趣參與一帶一路項目,股價應聲45度角上升破頂,收49.1元,升2.3%。藍籌股中,其實中石油(857)比港鐵更早搶閘「帶路」,目前正與一帶一路沿線19個國家進行50個合作項目。

雖然現時油價喺50美元關前遇阻,不過,喺加息環境下,除咗賺息差嘅金融股受惠外,商品價格如油價亦會受惠。近30年嚟,美國息口走勢同油價走勢就相當脗合,有如兩生花。點解會咁?關經濟事!皆因經濟擴張引致原料價格上升,亦引發政府加息遏抑通脹;反之亦然。

伊朗周五總統大選、油組(OPEC)下周四開會,都係油市焦點,炒家借消息炒作唔奇。事實上,油價仍然係投機資金之間嘅對賭,消息只係借嚟向對家逼倉!OPEC時代已成過去,OPEC產油量佔全球產油量跌到42%,一半都冇,成日嗌減產,似製造消息畀市場炒作!

油組老大沙特又確係有理由以減產托油價,皆因國營石油公司沙特阿美(Saudi Aramco)搞緊上市,油價上升對估值有利。不過,如意算盤敲唔敲得響,單靠非油組嘅俄羅斯支持未夠,仲要睇美國取態,美國一日唔參與,乜協議都形同虛設。早前,沙特就試過同俄羅斯一齊減產,結果畀美國乘機增產搶市場!Anyway,油價喺沙特阿美上市前有人「護價」,應該唔會大跌!

產油國減產,加上石油需求上升,國際能源總署(IEA)早前就預計油市上半年會供不應求。高盛日前亦指油市已見供應不足,到7月時每日供應缺口達200萬桶,現時係造好原油時機;該行預期第四季WTI期油見55美元,布蘭特期油見57美元;瑞銀更牛,睇後者今夏見60美元。

炒期油,隨時好似國泰(293)咁炒燶,不如吼下油股。野村指一帶一路開放油氣市場,有助油股降低整體投資組合風險、提升整體資本回報,令股價重新估值;該行根據首季成績,特別係潛在資產重組,較睇好中石油。瑞銀亦指中石油喺燃氣取得價值嘅潛力被低估。該股現價5.35元,預測市盈率19倍,不妨留意下。

Facebook fan page:
https://www.facebook.com/hkstockpicker/